Futja në treg e makinave elektrike ka sjellë një frymë të re në tregun e makinave.
Blerësit në vazhdimësi janë duke kërkuar më shumë makina elektrike dhe beneficionet e tyre po vazhdojnë të proklamohen si shpëtim i ambientit në të cilin jetojmë.
Edhe nëse për disa u konsiderua një modë teknologjike që nuk do të zgjasë, të dhënat aktuale tregojnë pikërisht të kundërtën. Makinat elektrike kanë ardhur për të qëndruar. Përparësitë e makinave elektrike ndaj makinave tradicionale, me benzinë, janë të shumta dhe kjo është arsyeja pse çdo vit ato fitojnë gjithnjë e më shumë besimin e shoferëve modernë. Në fakt, shumë vende kanë synime për të ndaluar shitjet e automjeteve me benzinë dhe naftë në të ardhmen.
Po cilat janë beneficionet kryesore të makinave elektrike:
Kosto më të ulëta të karburantit
Përfitimi më i dukshëm i blerjes së një makine elektrike është kursimi i kostos. Marrja e një makine elektrike mund të jetë më e shtrenjtë se një model i ngjashëm me motor, benzinë ose naftë, por në planin afatgjatë dikush kursen më shumë, pasi kostoja e karburantit është shumë më e ulët. Si rezultat, blerja e një makine elektrike duhet të trajtohet si një investim, pasi, pavarësisht shumës fillestare, është një zgjidhje me kosto efektive. Për më tepër, një makinë elektrike na shpëton nga nevoja për të furnizuar me karburant në një pikë karburanti, pasi mund ta ngarkojmë atë në shtëpi.
Kosto më të ulëta të mirëmbajtjes
Si rezultat i avantazhit të parë kemi faktin se, përveç kostove të ulëta të karburantit, makinat elektrike, gjithashtu, kanë kosto më të ulëta të mirëmbajtjes. Ato nuk kërkojnë ndryshim të vajrave, filtrave, prizave dhe pjesëve të ndryshme të këmbimit, të lidhura me një makinë konvencionale dhe të cilat rrisin ndjeshëm kostot e mirëmbajtjes së një makine. Me kalimin e kohës, kjo kosto e reduktuar mund të çojë në kursime të konsiderueshme.
Miqësore me mjedisin
Nuk ka asnjë pyetje për këtë. Makinat elektrike janë mënyra më e mirë për të zvogëluar gjurmët tuaja mjedisore. Modelet tradicionale të makinave krijojnë shumë probleme mjedisore, për shkak të ndotësve të dëmshëm që lëshojnë. Një makinë elektrike është alternativa ekologjike pasi lëshon zero ndotës. Me ekspertët që i bien ziles së alarmit çdo ditë rreth problemeve mjedisore, me të cilat përballet planeti ynë, është mirë që të gjithë ne po fillojmë të fitojmë vetëdije ekologjike. Marrja e një makine elektrike mund të ndihmojë në këtë aspekt.
Drejtimi i rehatshëm
Automjetet elektrike ofrojnë një përvojë më të rehatshme dhe të relaksuar drejtimi. Ato në përgjithësi kanë një qendër më të ulët të gravitetit, e cila ofron trajtim, rehati dhe përgjigje më të mirë. Motori elektrik siguron nxitim dhe ngadalësim të qetë për një udhëtim të qetë. E gjithë kjo i bën automjetet elektrike të këndshme për t’u drejtuar.
Privilegjet e veçanta
Në qendrat e mëdha urbane, drejtuesit e makinave elektrike nuk shqetësohen për të gjetur një vend parkimi, pasi ofrohet qasje falas ose me kosto të ulët në shumë parkingje. Për më tepër, shoferi i një makine elektrike gëzon uljen e taksës së rrugës dhe lëvizjen e lirë në ring. Së fundi, përmes programit “ne lëvizim në mënyrë elektrike” sigurohet një subvencion për blerjen ose marrjen me qira afatgjatë të një automjeti elektrik, ndërsa një subvencion mund të jepet edhe për instalimin në banesën kryesore të një karikuesi të zgjuar shtëpiak.
Paketat e specializuara të sigurimit
Makina ndryshon dhe sigurimi përshtatet me të dhënat e reja. Makinat elektrike punojnë ndryshe nga ato konvencionale dhe kjo është arsyeja pse paketat tradicionale të sigurimit nuk janë të mjaftueshme për të mbuluar plotësisht pronarin dhe automjetin. Përmes paketave të veçanta të sigurimit, shoferi i një makine elektrike tani është i sigurt se do të gjejë sigurimin që e mbulon, në mënyrë që ai të mund të ngasë i sigurt dhe me besim!
Lehtësirat në mbushje elektrike
Në nismën për të zëvendësuar makinat me karburante me makina elektrike ishte shpërfaqur sfida e mbushjes së tyre me energji elektrike. Paisjet e rimbushjes ishin të rralla dhe shoferët duhej të kishin një plan të detajuar për t’u rimbushur gjatë udhëtimeve të gjata.
Mirëpo, këto probleme tashmë kanë nisur të ndryshojnë. Në Kosovë dhe në Shqipri tashmë janë vendosur dhjetëra pajisje të mbushjes së shpejtë në pika të karburanteve dhe trendet tregojnë që bizneset planifikojnë të rrisin kapacitetet edhe më shumë.
Si rezultat, një pjesë e autostradave tashmë kanë qendra të mbushjes, ndërsa në dalje të qyteteve të mëdha pompat e derivateve e ofrojnë shërbimin.
